श्रीलंकामा पेट्रोल भर्न दस दिन लाइनमा

राजनीतिमा वंशवाद हाबी हुँदा आर्थिक संकट झेलिरहेको श्रीलंकामा इन्धन भर्न घण्टौँ लाइन लाग्ने कुरा सामान्य बनिसकेको । विदेशी मुद्राको सञ्चिति नहुँदा इन्धन आयात गर्न श्रीलंकालाई धौधौ भएको छ ।

राजधानी कोलम्बोमै तेल भर्न लाम बसेका गाडीको लाइन ५ किलोमिटरभन्दा बढी छ । यसैबीच बीबीसी पाकिस्तान र अफगानिस्तान संवाददाता सिकंन्दर किरमानीले दस दिनेदेखि पेट्रोलको लाइनमा बसेका एक मिनीबस चालकसँग कुरा गरेका छन् । दस दिनदेखि लाइनमा रहेका ४३ वर्षीय प्रथम भन्छन्, ‘म गत बुधबारदेखि गाडीमै सुतिरहेको छु । निकै कठिन छ तर के गरुँ । मैले पूरा ट्यांकी तेल पनि पाउनेवाला छैन ।’

श्रीलंकामा राजनीतिक र आर्थिक संकट गहिरिँदै गएको छ । महँगी ५० प्रतिशतसम्म बढेको छ । राष्ट्रपति राजापाक्षले मुलुक छाडेर भागेका छन् । व्यापक विरोधपछि उनले मुलुकबाहिरबाटै राजीनामा दिएका छन् । कतिपयले कोरोना महामारीका कारण पर्यटन उद्योग धराशयी भएको र फलस्वरुप अहिलेको संकट निम्तिएको बताउँछन् । तर अर्थविश्लेषकहरू भने सरकारको आर्थिक नीतिका कारण संकट निम्तिएको बताउँछन् । न्यून विदेशी मुद्रा सञ्चितिका कारण तेल र औषधिजस्ता अत्यावश्यक सामग्री आयात गर्न पनि कठिन भएको छ ।