श्रीलंका टापुमा वस्तु चराउन गएका ४० गोठाला फसे

सप्तरी- सप्तकोसी नदीमा पानीको बहाव यो बर्षकै उच्च भएको छ । सप्तकोशीमा आएको बाढीले पश्चिम क्षेत्रमा धार परिवर्तन गर्दा सुनसरीको बराहक्षेत्र नगरपालिका–६ को श्रीलंका टापुको गरैयामा गाई बस्तु चराउन गएका गएका ४० जना भन्दा बढी स्थानीय बीच कोशीमा अलपत्र परेका छन् ।

बराहक्षेत्रको ठाकुरवारी पारीपट्टीको भागमा गाई बस्तु चराउन आएका सर्बसाधारणहरुलाई कोशीमा आएको बाढीका कारण सम्पर्कविहीन भएको भन्दै तत्काल स्थानीयले उद्धार गर्न माग गरेका छन् ।

श्रीलंका टापुको सोमवारेको डुडखोला र गरैयामा सप्तकोशीले धार परिवर्तन गरेपछि गोठालो गएका ४० जना सर्बसाधारण सप्तकोशीको बीच भागमा अलपत्र परेको बताइएको छ । गोठालो गएका सर्बसाधारण कोसीले धार परिवर्तन गरी अलपत्र परेपछि सुनसरीका प्रमुख जिल्ला अधिकारी उमेशकुमार ढकाल, सशस्त्र प्रहरी वल ४ नम्बर गण सुनसरीका प्रमुख माधवप्रसाद पौडेल गोताखोरसहितको सुरक्षाकर्मीको उद्धार टोली लिएर घटनास्थल पुगेको छ ।

‘ठाकुरवारि पारीपट्टी गोठालो गएकाहरु बीच कोशीमा अलपत्र परेको खबर आएको छ । हामी उद्धारका लागि जाँदैछौं’, सशस्त्र प्रहरी प्रमुख पौडेलले भने, ‘घटनास्थल पुगेपछि एकिन विवरण आउने छ ।’ महिना दिनदेखि सप्तकोशीमा आएको बाढीले कटान गरी मानव बस्ती प्रबेश गर्दा समेत सरकारले कोशी आसपासका सर्वसाधारणको सुरक्षामा चासो नदेखाएको स्थानीय सन्तोष चन्द्रबंशीले बताए । उनले प्रत्यक बर्ष असार, साउन र भदौं महिनामा कोशीको त्रासले १० हजार भन्दा बढी सर्बसाधारण त्रासमा बस्नु परेको गुनासो गरे ।