अफगान महिलाको अधिकारका लागि भन्दै संयुक्त राष्ट्रसंघको मुख्यालयबाहिर प्रदर्शन

काठमाडौं– संयुक्त राष्ट्रसंघको मुख्यालय अगाडि सयौं महिलाहरूले प्रदर्शन गरेका छन्।

उनीहरूले अफगानिस्तानका महिलाको मानवअधिकार सुनिश्चित गर्न माग गरेका थिए। उनीहरूको अधिकार स्थापित गर्न राष्ट्रसंघलगायत विश्वको ध्यान जानुपर्नेमा प्रदर्शनकारीले जोड दिएका थिए।

प्रदर्शनमा सहभागीहरूले आफ्नो अधिकार प्राप्तिका लागि सङ्घर्ष गर्न अफगानिस्तानमा रहेका महिलाहरूलाई पनि आग्रह गरेका थिए।

तालिबान विद्रोहीहरूले सत्ता कब्जा गरेर सरकार बनाएपछि महिलाहरूलाई रोजगारी गर्न नदिने, सार्वजनिक कार्यक्रमहरूमा सहभागी हुन नदिने, शैक्षिक संस्थाहरूमा सहजै अध्ययन अध्यापन गर्न नदिने, छुट्टै कक्षामा बस्नु पर्नेलगायतका व्यवस्था गरेपछि विश्वभरीबाट यसको विरोध भइरहेको छ।