नेप्सेमा १०४ अंकको उछाल, १३ कम्पनीको कारोबारमा सकारात्मक सर्किट

काठमाडौं- नेपालको पुँजीबजारमा आज उछाल आएको छ। बुधबार पुँजीबजार मापक परिसूचक नेप्से १०४.८८ अंकले बढेको छ।

आज कूल १८५ वटा कम्पनीका एक करोड २१ लाख २२ हजार २९८ कित्ता सेयर ७२ हजार ७१४ पटक खरिद-बिक्री भएका थिए।

कारोबार भएकामध्ये एउटाबाहेक १८४ वटा कम्पनीको सेयर मूल्य बढेको छ।  आज १३ वटा कम्पनीको सेयर मूल्य १० प्रतिशतले बढेपछि सकारात्मक सर्किट लागेको थियो।

यसैगरी ठूला कम्पनीहरुको सेयर कारोबार मापन गर्ने सेन्सेटिभ परिसूचक पनि १९.४७ अंकले बढेर ५२८.१० विन्दुमा उक्लिएको नेप्सेले जनाएको छ।

आज सबै उपसमूहको परिसूचकमा सकारात्मक बनेको छ।

लगातार उच्च अंकले ओरालो लाग्दै आएको सेयरबजारमा मंगलबारबाट सुधार आउन थालेको थियो। सोमबार ११४.०२ अंकले घटेको नेप्से मंगलबार १३.८३ अंकले बढेको थियो। त्यसअघि अघिल्लो मंगलबारयता सेयरबजार लगातार घट्दै आएको थियो।