माघ १८ देखि भृकुटीमण्डपमा क्यान इन्फोटेक मेला हुने

सूचना तथा सञ्चार प्रविधि क्षेत्रको विशेष मेला क्यान इन्फोटेक आगामी माघ १८ गतेदेखि हुने भएको छ । काठमाडौंको भृकुटीमण्डपमा माघ २३ गतेसम्म हुनेगरी मेलाको तयारी अगाडि बढाइएको छ । यो क्यान इन्फोटेकको २७ औं संस्करण हो ।

गत वैशाख २८ गतेदेखि जेठ २ गतेसम्म मेला हुनेगरी तयारी गरिएकोमा कोभिड–१९ को दोस्रो लहर फैलिएपछि मेला स्थगित गरिएको थियो । सन् १९९५ देखि क्यान महासंघले क्यान इन्फोटेकको सुरुवात गरेको हो । प्रदर्शनीले कोभिड–१९ का कारण प्रभावित सम्पूर्ण सूचना तथा सञ्चार प्रविधि सम्बन्धी व्यवसायी तथा सम्बन्धित पक्षलाई राहत पुग्ने क्यान महासंघको भनाइ छ । पछिल्ला समय सूचना तथा सञ्चार प्रविधिको क्षेत्रमा भएका विकास तथा नवप्रवर्तनहरुलाई क्यान इन्फोटेक मेलामा ल्याइने महासंघले जनाएको छ ।

सूचना तथा सञ्चार प्रविधि प्रदर्शनीमा क्यान महासंघका सदस्य संस्थाहरूका साथै विभिन्न राष्ट्रिय र अन्तर्राष्ट्रिय सूचना तथा सञ्चार प्रविधिसम्बन्धी कम्पनीहरुको सहभागिता रहने प्रचलन छ । व्यवसायीहरूले व्यापार विस्तारका साथै नयाँ–नयाँ प्रविधिको प्रदर्शनी गर्ने थलोका रूपमा मेलालाई उपयोग गर्ने तथा अवलोकनकर्ताले एकै थलोमा सूचना तथा सञ्चार प्रविधिका नौला र भविष्यका निम्ति उपयोगी प्रविधि तथा उपकरणको अवलोकन/खरिद गर्न पाउनेछन् ।

यो मेला सूचना प्रविधिसम्बन्धी चासो राख्नेहरुको लागि यस क्षेत्रमा भएका विकास तथा प्रयोगका बारेमा जानकारी लिने विशेष थलो पनि हो । क्यान इन्फोटेकले सूचना तथा सञ्चार प्रविधि क्षेत्रका कम्पनीहरुलाई आफ्नो बजार विस्तार गर्ने, ग्राहकका आवश्यकता थाहा पाउने, बजार सर्वेक्षण गर्ने, नयाँ उत्पादनहरु सार्वजनिक गर्ने र ग्राहकसँग आपसी सम्बन्ध स्थापना गर्ने अभूतपूर्व अवसर दिनेछ । क्यान इन्फोटेक २०२२ मा ब्राण्डिङ, आइसिटी एसोसरिज, गेम पार्लर, प्रडक्ट लञ्चिङ, स्टार्ट अप, रोबोटिक्स, इमर्जिङ्ग टेक्नोलोजी, इ–वेष्ट म्यानेजमेन्ट, वाइफाइ तथा इन्टरनेट र लर्निङ सेन्टर लगायतका विभिन्न खण्डहरु रहनेगरी तयारी अगाडि बढाइएको आयोजकले जनाएको छ ।

विभिन्न सफ्टवेयर, नेटवर्किङ र क्लाउड सोल्युसन, मोबाइल फोन तथा सोल्युसन, इलेक्ट्रिकल तथा इलेक्ट्रोनिक्स, सेक्युरिटी सोल्युसन, सोलार पावर सिष्टम, इन्भर्टर, युपीएस, ल्यापटप तथा डेस्कटप कम्प्युटर, प्रिन्टर, पावर सिष्टम, कम्प्युटर एसोसरिज, एन्टीभाइरस सफ्टवेयर, बैंकिङ सोल्युसन, सीसीटीभी र हार्ड डिस्क, आईओटी तथा आर्टीफिसियल इन्टेलिजेन्स सम्बन्धी जानकारी मेलामा दिइने छ। आईटी कलेज, बैंक, बीमा तथा लेखासम्बन्धी सफ्टवेयर, सरकारी क्षेत्रमा प्रयोगमा आएका तथा आउने सफ्टवेयर र सोलुसन्स, स्वास्थ्य, पर्यटन र कृषिमा सूचना प्रविधि, सेल्फ लर्निङ सफ्टवेर तथा ट्युटोरियल आदि प्रर्दशनीमा रहनेछन् । क्यान इन्फोटेकको २६ औं संस्करण करिब साढे ३ लाखले अवलोकन गरेकोमा यो संस्करणमा समेत सोही संख्याका अवलोकनकर्ता आउने आयोजकको अनुमान छ ।