कांग्रेस नेता प्रदीप गिरिको निधनमा शोक बिदा

नेपाली कांग्रेसका नेता तथा प्रतिनिधि सभा सदस्य प्रदीप गिरिको निधन भएको शोकमा सिराहाको लहानमा बिदा दिइएको छ ।

नगर क्षेत्रभित्र शोक बिदा दिइएको मेयर महेशप्रसाद चौधरीले जानकारी दिए । उनका अनुसार नगरपालिकाभित्रका क्याम्पसहरू, शैक्षिक प्रतिस्ठानहरू र उद्योग बाणिज्य संघ पनि बन्द रहने छन् ।

‘उहाँ हाम्रो प्रतिनिधि सभा सदस्य हुनुहुन्थ्यो, त्यसैले नगर मातहमतमा रहेका कार्यालयमा शोक बिदा दिइएको छ’ मेयर चौधरीले भने, ‘उद्योगी व्यवसायीहरूले पनि बजार बन्द गर्ने निर्णय गर्नु भएको छ ।’

लहान गिरिको गृहनगर हो । उनले आफूलाई भेट्न आउनेहरूसँग आफ्नो अन्त्येष्टि जिल्लाकै बस्तीपुरमा गरिदिन आग्रहसमेत गरेका थिए । तर, नेपाली कांग्रेसले पशुपतिमै उनको अन्तिम संस्कार गर्ने निर्णय गरेको छ ।

त्यस्तै, नेपाली कांग्रेसका नेता प्रदीप गिरीको आज आईतबार अन्त्येष्टि गरिने भएको छ । समाजवादी चिन्तक कांग्रेस नेता प्रदीप गिरिको आइतबार अन्त्येष्टि गरिने भएको नेपाली कांग्रेसले जनाएको छ ।

कांग्रेस महामन्त्री विश्वप्रकाश शर्माका अनुसार आइतबार नै अन्त्येष्टि गरिने भएको छ । गिरिको शव बिहान ११ बजेसम्म मेडिसिटी हस्पिटलको शिवालयमा राखिनेछ ।

त्यसपछि, २ बजेसम्म कांग्रेस केन्द्रीय कार्यालयमा रहेको बिपी स्मृति भवनमा राखिने केन्द्रीय कार्यालयका मुख्यसचिव कृष्णप्रसाद पौडेलले जानकारी दिए । घाँटीको क्यान्सरबाट पीडित गिरिको मेडिसिटी अस्पतालमा उपचारको क्रममा शनिबार राति साढे नौ बजे निधन भएको हो ।

उपचारमा संलग्न क्यान्सर रोग विशेषज्ञ डा‌. पंकज वर्मनका अनुसार शरीरका अन्य भागमा पनि क्यान्सर फैलिएपछि बिहीबारदेखि भेन्टिलेटरमा राखेर उपचार गरिएको थियो ।

गिरि प्राणघातक क्यान्सर रोगबाट ग्रसित भई भारत स्थित हिन्दुजा लगायतका प्रसिद्व अस्पतालको उपचार पश्चात बिगत २६ दिनदेखि नेपाल मेडीसिटी अस्पताल भैंसिपाटिमा उपचारका लागि भर्ना भएका थिए ।

पछिल्लो तीन दिनदेखि गिरिको आईसीयूको ५५० नम्बरको बेडमा उपचार भइरहेको थियो । गिरिको स्वास्थ्य लाभको कामना गर्दै काठमाडौंमा शुक्रबार प्रार्थाना सभा आयोजना गरिएको थियो । साथै उनको जन्म स्थल सिरहाको बस्तीपुरमा समेत शुक्रबार किर्तन लगाउने र तुलसीमोठमा साँझपख बत्ति बालेर स्वास्थ्य लाभको कामना गरिएको थियो ।