सामाजिक सुरक्षा कोषले घातक रोग लागेमा १० लाख उपचार खर्च दिने

सामाजिक सुरक्षा कोषले योगदानकर्तालाई घातक रोग लागेमा बेहोर्ने भनेको १० लाख रुपैयाँसम्मको उपचार खर्च आगामी पुसदेखि लागू हुने भएको छ । सामाजिक सुरक्षा योजना सञ्चालन कार्यविधि २०७५ मा भएको संशोधित व्यवस्थाअनुसार योगदानकर्ताले मात्र पाउने औषधि उपचार सेवा उसको श्रीमान् वा श्रीमतीले पनि पाउनेछन् ।

कार्यविधिको तेस्रो संशोधन गत भदौ ५ गते श्रम, रोजगार तथा सामाजिक सुरक्षा मन्त्रालयले स्वीकृत गरेको र स्वीकृत भएको मितिले ३ महीनाभित्र लागू गर्ने व्यवस्था भएकाले पुसबाटै लागू गर्न लागिएको कोषका उपकार्यकारी निर्देशक विवेक पन्थीले जानकारी दिए । उनका अनुसार यो सुविधा लिन २ वर्ष योगदान गरेको हुनुपर्छ ।

घातक रोगको औषधि उपचार सुरक्षा योजनाअन्तर्गत कोषमा कम्तीमा २ वर्ष रकम जम्मा गरेको योगदानकर्ताको कोरोनरी आर्टरी बाइपास वा ओपन हार्ट सर्जरी, मस्तिष्कघात, मिर्गौला रोग, क्यान्सर, पार्किन्सन्स, अल्जाइमर्स, स्पाइनल इन्जुरी, हेड इन्जुरी, सिकलसेल एनिमिया र हेमोफेलिया वा थालासेमिया रोगका लागि सेवा अवधिभर १० लाख रुपैयाँसम्मको खर्च कोषले बेहोर्नेछ । उक्त सुविधा लिन योगदानकर्ताले सरकारी वा कोषले तोकेको अस्पतालमा उपचार गराउनुपर्नेछ । कोषमा आबद्ध भएको विदेशमा कार्यरत श्रमिकले पनि यो सुविधा पाउनेछ । घातक रोगको औषधि उपचार सुविधा कोषमा योगदान गर्न छाडेको २ वर्षसम्म लागू हुनेछ ।

कोषको वृद्धावस्था सुरक्षा योजनाअन्तर्गत निवृत्तिभरण शुरू भएको ७ वर्षसम्म पनि घातक रोगसम्बन्धी सुविधा उपयोग गर्न सकिने व्यवस्था लागू गरिँदै छ ।

कोषले प्रधानमन्त्री रोजगार कार्यक्रम, युवा रोजगारीका लागि रूपान्तरण पहल परियोजना र रोजगार प्रवर्द्धन कार्यक्रममा आबद्ध श्रमिकलाई समेत कोषको कार्यक्रममा ल्याउँदै छ । आगामी शैक्षिक सत्रबाट सन्तति छात्रवृत्ति लागू हुँदै छ । योगदानकर्ता सन्तति छात्रवृत्ति सञ्चालन कार्यविधि, २०७९ ले कोषमा योगदान गर्ने श्रमिकका बालबच्चाले चिकित्सा विज्ञान, इन्जिनीयरिङ, नर्सिङ, वन विज्ञान, कृषि विज्ञान र होटेल तथा ट्राभल व्यवस्थापन विषयका लागि हरेक वर्ष प्रत्येक प्रदेशबाट १२ जनाका दरले जम्मा ८४ जनालाई छात्रवृत्ति प्रदान गर्ने व्यवस्था गरिसकेको छ । यो सत्र शुरू भइसकेकाले यस वर्ष लागू गर्न अप्ठ्यारो भएको र अर्को शैक्षिक सत्रबाट लागू गरिने कोषका उपकार्यकारी निर्देशक पन्थीले बताए । कोषले दोस्रो संशोधनमा योगदानकर्तालाई शैक्षिक सापटी, घरजग्गा सापटी, व्यवसायका लागि सापटी र अन्य सुविधा पनि थपेको थियो ।

सामाजिक सुरक्षा कोषमा योगदानकर्ताले अहिलेसम्म २४ अर्ब २३ करोड रुपैयाँ जम्मा गरिसकेका छन् । १७ हजार ४ सय रोजगारदाता, ३ लाख ६८ हजार योगदानकर्ता सामाजिक सुरक्षा योजनामा सहभागी भइसकेका छन् । कोषका अनुसार जम्मा भएको धेरैजसो रकम मुद्दती खातामा राखिएको छ । सापटी दिन पनि शुरू गरिएको छ । यसले गर्दा सामाजिक सुरक्षा योजनाप्रति आकर्षण बढिरहेको कोषको दाबी छ ।