नेपाल उद्योग वाणिज्य महासंघद्वारा लगानीकर्ता कार्यक्रमको आवेदन खुला

११ भदौ, काठमाडौं । नेपाल उद्योग वाणिज्य महासंघले लगानीकर्ताहरूसँग आबद्ध हुन इच्छुक नवप्रवर्तनीय (स्टार्टअप) उद्यमीहरूका लागि लक्षित गरी ल्याएको ‘५० स्टार्टअप-५० लगानीकर्ता’ कार्यक्रममा सहभागी हुनका लागि आवेदन दिने समय पुनः खुला गरेको छ।

कार्यक्रममा अनलाइन आवेदन गत वैशाख ४ गतेदेखि खुला गरिएको थियो। ५० स्टार्टअप-५० लगानीकर्ता कार्यक्रम महासंघको स्टार्टअप एण्ड इनोभेसन समितिको पहलमा ल्याइएको हो।

महासंघका अनुसार आवेदन सबै क्षेत्र (कृषि, उत्पादनमुलक, सूचना प्रविधि, सेवा) का लागि दिन सकिनेछ। उक्त आवेदन प्रक्रियालाई पुनः खुला गरी कार्यक्रममा मुलुकभरबाट बढीभन्दा बढी स्टार्टअप उद्यमीहरूको सहभागिता बढाउने कार्यमा सहयोग गर्न महासंघले आफ्ना सातवटै प्रदेश च्याप्टरहरूलाई आग्रह गरेको छ।

लगानीकर्ताहरूको व्यावसायिक अभिरूचीसँग छनोट भएर आउने स्टार्टअपहरूलाई मिलान गराइ फलदायी सहकार्यका लागि सहजीकरण गर्ने कार्यमा स्टार्टअप समितिले सहयोग गर्ने महासंघको भनाइ छ।

आवेदनका साथ कम्पनी दर्ता प्रमाणपत्रको प्रतिलिपि तथा कम्पनीको विधान प्रबन्धपत्र, मेमोरेन्डम अफ एसोसिएसन, आर्टिकल अफ एसोसिएसन र सम्बन्धित अन्य रजिस्ट्रेनहरू, प्यान/भ्याट दर्ता, कर चुक्ता प्रमाणपत्र, कम्पनीको सञ्‍चालक समितिको माइन्युट, कम्पनीका प्रवर्द्धक/संस्थापकहरूको बायोडाटालगायतका आवश्यक दस्तावेजहरू संलग्न हुनुपर्ने महासंघले जानकारी दिएको छ।