आज सरकारको चालु खाताबाट खर्च भएन, पुरानै दरमा कर उठाइयो

काठमाडौँ– चालु आर्थिक वर्षको बजेट पारित नभएका कारण बिहीबार सरकारको चालु खाताबाट खर्च शून्य भयो । बजेट पारित नभएका कारण सरकारले कुनै पनि शीर्षकमा रकम खर्च गर्न नसकेको हो ।

• कर सम्बन्धिका विभिन्न कारोबार भने पुरानै दरमा भएको अर्थ मन्त्रालयका प्रवक्ता महेश आचार्यले बताए । कर उठाउन नेपाल सरकारलाई कुनै पनि बाधा नभएको उनले बताए ।

उनले भने, ‘सरकारले हरेक दिन खर्च गर्दैन र अध्यादेश अनुसार राजस्व लिने काम भइरहको छ ।’ तत्कालीन ओली सरकारले अध्यादेशबाट ल्याएको बजेट परिमार्जन देउवा सरकारले संसदमा प्रतिस्थापन विधेयक ल्याएको थियो ।

२६ भदौ गते अर्थमन्त्री जनार्दन शर्माले संघीय संसद प्रतिनिधिसभाको बैठकमा प्रतिस्थापन विधेक पेश गरेका थिए । तर बजेट सम्बन्धी ती विधेयकहरु पारित हुन सकेनन् । ओली सरकारले अध्यादेश ल्याएको पनि बुधबार २ महिना पुग्यो । संविधानअनुसार अध्यादेश संसद चलेको अवस्थामा दुई महिनाभित्र पारित नभए निष्क्रिय हुने भएकाले अहिले देश बजेटबिहीन अवस्थामा पुगेको छ ।