रसुवा, नुवाकोट र धादिङमा डेढ लाख नागरिक बाढीबाट प्रभावित

२६ भदौ, काठमाडौं । रसुवाको भोटेकोशी र त्रिशूली नदीमा आएको विनाशकारी बाढीबाट रसुवा, नुवाकोट र धादिङलगायत जिल्लामा करिब डेढ लाख नागरिक प्रभावित भएको प्रारम्भिक आँकलन गरिएको छ।

शुक्रबार प्रतिनिधिसभाको शिक्षा, स्वास्थ्य तथा सूचना प्रविधि समितिको बैठकमा स्वास्थ्य तथा खाद्य स्वच्छता मन्त्रालयका सचिव डा. विकास देवकोटाले बाढीबाट प्रभावित जनसंख्याको प्रारम्भिक विवरण प्रस्तुत गरेका हुन्।

बागमती प्रदेश सरकार तथा मन्त्रालयका विभिन्न संयन्त्रमार्फत संकलन गरिएको विवरणका आधारमा करिब डेढ लाख नागरिक प्रत्यक्ष प्रभावित भएको उनले जानकारी दिए।

बाढी प्रभावित क्षेत्रबाट उद्धार गरी होल्डिङ सेन्टरमा राखिएकामध्ये २५ जनामा झाडापखाला देखिएको पनि सचिव देवकोटाले समितिलाई जानकारी गराए। तर झाडापखालाबाहेक अन्य गम्भीर प्रकृतिका महामारी वा संक्रामक रोगको संक्रमण भने हालसम्म नदेखिएको उनले स्पष्ट पारे।

बैठकमा सांसदहरूले बाढी प्रभावित क्षेत्रमा स्वास्थ्य जोखिम र सम्भावित महामारीबारे प्रश्न उठाएका थिए। जवाफमा सचिव देवकोटाले स्वास्थ्य मन्त्रालयले प्रभावित क्षेत्रमा स्वास्थ्य अवस्थाको निगरानी गरिरहेको बताए।

जलवायु अनुकूल संरचनाको गुरुयोजना बन्दै

बाढीको पछिल्लो विपद्बाट स्वास्थ्य क्षेत्रले महत्वपूर्ण पाठ सिकेको भन्दै सचिव देवकोटाले आगामी दिनमा निर्माण हुने स्वास्थ्य संरचनालाई जलवायु अनुकूल बनाउनुपर्नेमा जोड दिए।

भौगोलिक अवस्था र तापक्रमअनुसार भवन निर्माणको अवधारणा अघि बढाउनुपर्ने उनको भनाइ छ। उनका अनुसार अत्यधिक गर्मी हुने क्षेत्र र चिसो हुने क्षेत्रका स्वास्थ्य संरचना एउटै मापदण्डमा निर्माण गर्नु उपयुक्त हुँदैन।

नयाँ संरचना निर्माण गर्दा स्वास्थ्य समस्या पर्दा सहज रूपमा सेवा लिन सकिने गरी नजिकका स्वास्थ्य संस्थाको अवस्थालाई समेत आधार बनाउनुपर्ने उनले बताए।

मन्त्रालयले पुनर्स्थापना तथा पुनर्निर्माणका लागि जलवायु अनुकूल संरचनासहितको गुरुयोजना निर्माण गरिरहेको उनले जानकारी दिए। गुरुयोजना तयार भएपछि संसदीय समितिमा पेस गर्ने प्रतिबद्धता समेत उनले जनाएका छन्।