पहिरोका कारण काठमाडौं प्रवेश गर्ने मुख्य नाका नागढुङ्गा ठप्प

काठमाडौं- काठमाडौंको नागढुङ्गास्थित चिसापानीमा पहिरो खसेको छ । पहिरोका कारण त्रिभुवन राजपथ हुँदै काठमाडौं भित्रिने सवारी साधन रोकिएका छन् ।
नागढुङ्गाबाट एक किलोमिटर अगाडि चिसापानीमा पहिरो गएको महानगरीय प्रहरी परिसर काठमाडौंका प्रवक्ता (एसपी) रमेश बस्नेतले जानकारी दिए । सडक विभागसँगको समन्वयमा पहिरो पन्छाउने काम भइरहेको एसपी बस्नेतले जानकारी दिए ।

सिद्धार्थ राजमार्गका आधा दर्जन ठाउँमा पहिरो, हेलम्बुमा पनि सडक अवरुद्ध
सिद्धार्थ राजमार्ग अन्तर्गत बुटवल पाल्पा सडक खण्डको आधादर्जन भन्दा धेरै ठाउँमा पहिरो खसेको छ । पहिरोले सडक अवरुद्ध हुँदा यात्रुको बिचल्ली भएको छ । त्यसैगरी बाढी पहिरोको कारण सिन्धुपाल्चोकको हेलम्बुमा पनि सडक अवरुद्ध भएको छ ।

निरन्तरको वर्षाले पाल्पाको तिनाउ गाउँपालिका–३ को सिद्धबाबा क्षेत्रमा पहिरो खसेको छ । त्यस्तै तिनाउ ३ को सिसुवा, तिनाउ ५ को हिउदेखोला, केरावारी र जोरधारामा पहिरो खसेको जिल्ला प्रहरी कार्यालय पाल्पाले जनाएको छ । तानसेन नगरपालिका–७ बर्तुङ चोक नजिक, बगनासकाली गाउँपालिका ३ धैरेनी, बगनाशकाली गाउँपालिका–४ सेरामा र रम्भा गाउँपालिका– ३ सीतापहाडमा पनि सडकमा पहिरो खसेको पाल्पाका प्रहरी प्रवक्ता डिएसपी रामेश्वर त्वातीले जानकारी दिए ।

पहिरोका गाडी नचल्दा कारण बुटवलबाट पाल्पा, गुल्मी, अर्घाखाँची, स्याङजा, पर्वत, बागलुङ जाने यात्रुलाई समस्या भएको छ । कतिपय सवारी र यात्रुहरु बीच बाटोमै अलपत्र परेका छन् । पाल्पाको आर्यभन्ज्याङ र दोभान तर्फबाट पहिरो पन्छाउन सुरु गरिएको छ । आज दिनभरमा यातायातका साधन सञ्चालनमा आउन सक्ने त्वातीले बताए। सिद्धार्थ राजमार्ग बाहेक तानसेन रिडी खण्डको सम्मोबारीमा पनि पहिरो खसेको छ ।
हेलम्बुमा पनि सडक अवरुद्ध
त्यसैगरी लगातारको वर्षा र बाढीले पहिरो खस्दा सिन्धुपाल्चोकको हेलम्बु राजमार्ग पुनः अवरुद्ध भएको छ । मेलम्ची नगरपालिका–१३ मेलम्ची–जिरोकिलो सडक खण्डस्थित फटकशिला रातोपहरोमा माथिबाट पहिरो खसिरहेकाले सडक अवरुद्ध भएको प्रहरीले जनाएको छ । बर्षा निरन्तर भइरहेकाले पहिरो पन्छाएर सडक सञ्चालनमा ल्याउन समय लाग्ने प्रहरीले जनाएको छ ।

त्यस क्षेत्रमा अहिले निकै जोखिम रहेकाले अहिले वैकल्पिक सडक प्रयोग गर्न इलाका प्रहरी कार्यालय मेलम्चीका प्रहरी निरीक्षक टीकाराम राईले आग्रह गरे । गत साउन अन्तिमदेखि नै यहाँ निरन्तर माथिबाट पहिरो र तलबाट खोलाले सडक कटान गरिरहेको छ ।
पैराबारीका घर जोखिममा
बाटो माथिबाट पहिरोसँगै ढुङ्गा खस्दा मेलम्ची–१० रामपुर पैराबारीका घर जोखिममा परेका छन् । गतवर्षदेखि नै पैराबारी ज्यामिरेमा सडक खन्ने क्रममा ढुङ्गा खसेर बसेको र यस वर्ष पनि ढुङ्गा खस्ने क्रम जारी रहेको स्थानीयवासी प्रशान्त कार्कीले जानकारी दिए ।

बाटोमुनि भूकम्पपीडितका पाँच घर पहिरोको जोखिममा परेका छन् । ढुङ्गा खसेर दुर्घटना हुने डरले आनन्दले बस्न सुत्न नसकिएको स्थानीयवासीको गुनासो छ । घरमाथि ठूलो ढुंगा अड्किएर बसेको छ । गत वर्षदेखि नै पहिरो पनि आइरहेको जानकारी नगरलाई गराए पनि चासो नदिएको गुनासो कार्कीले गरे । ‘पानी पर्न थालेपछि घर छाडेर भाग्नुपर्ने अवस्था छ, तर हाम्रो समस्यामा नगरपालिकाले चासो दिएन,’ उनले भने ।