चिनियाँ प्रविधि कम्पनी Alibaba Group ले कृत्रिम बुद्धिमत्ता (एआई) क्षेत्रमा लगानी विस्तार गर्न हङकङमा नयाँ शेयर निष्कासनमार्फत ८० अर्ब हङकङ डलर (करिब १०.२ अर्ब अमेरिकी डलर) जुटाउने योजना सार्वजनिक गरेको छ।
हाङजाउमा मुख्यालय रहेको अलिबाबाले एआई प्रविधिमा ठूलो लगानी गर्दै आएको छ। कम्पनीका शेयरधारकहरूले भने एआईमा भइरहेको ठूलो लगानीबाट अपेक्षित प्रतिफल प्राप्त हुने विषयमा चासो व्यक्त गर्दै आएका छन्।
कम्पनीले शेयर निष्कासन विश्वव्यापी एआई नेतृत्व विस्तार गर्ने उद्देश्यले गर्न लागिएको जनाएको छ। शेयर बिक्रीबाट प्राप्त सम्पूर्ण रकम एआईसम्बन्धी पूर्वाधार विस्तार तथा आफ्नो ‘फुल–स्ट्याक एआई क्षमता’ विकासमा लगानी गरिने अलिबाबाले जनाएको छ।
अलिबाबाले बिहीबार सार्वजनिक गरेको पछिल्लो त्रैमासिक वित्तीय विवरणअनुसार कम्पनीको राजस्व करिब २६९ अर्ब युआन (करिब ४० अर्ब अमेरिकी डलर) पुगेको छ। विश्वव्यापी रूपमा एआई प्रविधिको माग बढेसँगै कम्पनीका एआईसम्बन्धी उत्पादन तथा सेवाको मागसमेत बढेको जनाइएको छ।
अलिबाबा आफ्नो खुला स्रोतको ‘क्वेन’ एआई मोडेलका लागि परिचित छ। कम्पनीका अनुसार उक्त एआई मोडेल विश्वभरका विकासकर्तामाझ लोकप्रिय बन्दै गएको छ।
