चार जलविद्युत् आयोजना बन्द

काठमाडौँ – प्रशारण लाइनको टावर ढलेपछि म्याग्दी, मुस्ताङ र पर्वतमा सञ्चालित चार जलविद्युत् आयोजनाका उत्पादन बन्द भएका छन्।

पर्वतको कुश्मा नगरपालिका-८ चुवामा प्रसारण लाइनको टावर ढालेर म्याग्दीका दुई, पर्वत र मुस्ताङका एक/एक आयोजनाको ७०.६ मेगावाट विद्युत् प्रसारण प्रणालीबाट विच्छेद भएको हो।

मोदीखोला-१ जलविद्युत् आयोजनाको विद्युतगृहदेखि मोदी सबस्टेसन जोड्ने १३२ केभी क्षमताको प्रसारण लाइनको चार नम्बरको टावर गत शुक्रबार राति बाढीपहिराका कारण ढलेको थियो।

दश मेगावाट क्षमताको मोदी-१ जलविद्युत् आयोजनाको प्रवर्द्धक युनाइटेड मोदीका प्रबन्ध निर्देशक उपेन्द्र गौतमले मोदी सबस्टेसन भएर राष्ट्रिय प्रसारण लाइनमा जोडिने अन्य आयोजना पनि प्रभावित भएका जानकारी दिए। पाँचसय मिटर नहरमा माटो थुप्रिएको मोदी-१ को बाँधमा पनि क्षति पुगेको छ।

नेपाल विद्युत् प्राधिकरणले डाइभर्सन (वैकल्पिक) टावर बनाउन र ढलेको टावर मर्मतमा ढिलाइ गर्दा करोडौं मूल्यको नोक्सानी भएको माउन्टेन इनर्जी नेपाल प्रवर्द्धन रहेको म्रिस्तीखोला जलविद्युत् आयोजनाका प्रतिनिधि चुडामणि निरौलाले बताए।

‘विद्युत् प्राधिकरणले खपत गर्न नसक्दा ३० देखि ३५ मेगावाटको हाराहारीमा उत्पादन गरिरहेका थियौं’, उनले भने, ‘सञ्चालनमा आएको दुई महिनामै उत्पादन बन्द गर्नुपर्दा थप घाटा व्यहोर्नुपर्ने भयो।’

कालीगण्डकी कोरिडोर प्रसारण लाइनको २२० केभी क्षमताको दाना सबस्टेसनमा जोडिएका मिस्त्री खोला, थापाखोला र घलेम्दीको विद्युत् कुस्माको खुर्कोट सबस्टेसन हुँदै मोदी-१ को १३२ केभी प्रसारण लाइनमार्फत् मोदी सबस्टेसनमा पुग्छ।

मोदी सबस्टेसनसम्म पुग्ने विद्युत् स्थानीय क्षेत्रमा वितरण हुँदै आएको छ।

बढी भएको विद्युत् मोदीबाट लेखनाथ सबस्टेसनसम्म पुर्‍याउने गरिएको छ।

प्राधिकरणले टावर मर्मतको काम तत्काल सुरू गर्न र विद्युत् आपूर्तिलाई सुचारु गर्न वितरण तथा ग्राहक सेवा गण्डकी प्रादेशिक कार्यालय पोखराका प्रमुख केदार सिलवाल, पोखरा ग्रिड प्रमुख माधव पौडेललगायत टोलीलाई खटाएको जनाएको छ। मुस्ताङ, पर्वत, म्यादी र बागलुङ जिल्लाको विद्युत् सेवालाई शनिबार साँझदेखि नै सञ्चालनमा ल्याएको प्राधिकरणको टोलीले प्रसारण लाइन मर्मतमा प्राथमिकताका साथ निरन्तर खटिएको जनाइएको छ।

यसपालिको बर्खा सुरू भएयता गण्डकी प्रदेशका विद्युत् पूर्वाधारमा रु १०  अर्बभन्दा बढीको क्षति पुगेको स्वतन्त्र ऊर्जा उत्पादकको संस्था नेपाल (इपान)ले जनाएको छ।

बाढीपहिराले निर्माणाधीन तथा निर्माण पूरा भई सञ्चालनमा आएका जलविद्युत् आयोजना एवं प्रसारण र वितरण लाइनका संरचना क्षतिग्रस्त हुँदा ऊर्जा क्षेत्रका लागि ठूलो आर्थिक नोक्सानी भएको इपानका प्रदेश सदस्य शंकर बस्यालले बताए। रासस