ढकाल : ‘निजी क्षेत्र नआत्तिऔँ, हौसला नहारी पुनर्निर्माणतर्फ अघि बढौँ’

काठमाडौं । नेपाल उद्योग वाणिज्य महासंघका अध्यक्ष तथा आईएमई समूहका संस्थापक चन्द्र ढकालले हालैको प्रदर्शनका क्रममा निजी सम्पत्तिमाथि भएको आक्रमणले ठूलो क्षति भए पनि उद्योगी व्यवसायीहरूले मनोबल कमजोर पार्न नहुने बताएका छन्।

ढकालले सामाजिक सञ्जालमार्फत् दिएको सन्देशमा अर्बौं लगानी भएका आफ्नै आयोजनामा भएको तोडफोड र आगजनीले मन भारी भए पनि मुलुकका हजारौँ रोजगारी र लगानीकर्ताको विश्वास जोगाउन हौसला दिनुपर्ने बताए। “गहभरी आँसु झारेर टोलाइरहन मन लागे पनि, निजी क्षेत्रको नेतृत्व गर्ने जिम्मेवारी भएकाले साथीहरूलाई मलम लगाउँदै हौसला दिनुपर्छ,” उनले भने।

चार दशकअघि कुनै बिँउ पुँजी विना व्यवसाय सुरु गरेको स्मरण गर्दै ढकालले इमानदारी, निरन्तरता र मेहनतकै आधारमा आफ्नो व्यावसायिक यात्रा फराकिलो राजमार्गमा पुगेको बताए। उनका अनुसार हाल उनका व्यवसायहरूले २० हजारभन्दा बढी नेपालीलाई प्रत्यक्ष रोजगारी र लाखौँलाई अप्रत्यक्ष अवसर उपलब्ध गराएका छन्।

भदौ २३ र २४ को जेन–जी आन्दोलनका क्रममा मुलुकभर उद्योग, व्यवसाय र निजी सम्पत्तिमा ठूलो क्षति भएको उल्लेख गर्दै उनले यसले लगानीमैत्री वातावरण र विदेशी लगानीकर्ताको मनोबलमा नकारात्मक सन्देश पठाएको बताए। त्यसैले क्षतिग्रस्त आयोजनाका फोटो र भिडियो सार्वजनिक नगर्न आग्रह गरेको पनि उनले जानकारी दिए।

ढकालले भने, “साथीहरू, हामी नआत्तिऔँ, नथाकौं। क्षतिग्रस्त उद्योग–व्यवसायको पुनर्निर्माणमा होमिऔँ, थप लगानी गरी रोजगारी सिर्जनामा लागौँ। निजी क्षेत्र मुलुकको अर्थतन्त्रको इन्जिन हो—यो ८१ प्रतिशतभन्दा बढी योगदान दिने र ८६ प्रतिशतभन्दा बढी रोजगारी सिर्जना गर्ने क्षेत्र हो।”

विगतका भूकम्प, नाकाबन्दी र कोभिड महामारी जस्ता कठिन क्षणलाई स्मरण गर्दै उनले फेरि पनि सबै उद्योगी व्यवसायीलाई साहस, आत्मबल र एकताको साथ अघि बढ्न आह्वान गरे।