सर्वोत्तम पेन्ट्स ईण्डष्ट्रिजको आईपीओ भर्ने आज अन्तिम दिन

काठमाडौं — सर्वोत्तम पेन्ट्स इण्डष्ट्रिज लिमिटेड ले सर्वसाधारणका लागि निष्कासन गरेको प्रारम्भिक सार्वजनिक निष्कासन (आईपीओ) मा आवेदन दिने आज अन्तिम दिन रहेको छ।

कम्पनीले आफ्नो जारी पूँजी ३४ करोड रुपैयाँको २५ प्रतिशत बराबर ८ करोड ५० लाख रुपैयाँ मूल्यको ८ लाख ५० हजार कित्ता साधारण शेयर निष्कासन गर्न अनुमति प्राप्त गरेको हो। प्रतिकित्ता १०० रुपैयाँ अंकित मूल्यमा जारी गरिएको आईपीओमध्ये १० प्रतिशत अर्थात् ८५ हजार कित्ता शेयर वैदेशिक रोजगारीमा रहेका नेपालीहरूका लागि छुट्याइएको थियो, जसको निष्कासन तथा बाँडफाँट यसअघि नै सम्पन्न भइसकेको छ।

कुल निष्कासित शेयरमध्ये ४२ हजार ५०० कित्ता सामूहिक लगानी कोषका लागि तथा १७ हजार कित्ता कर्मचारीहरूका लागि छुट्याएर बाँकी ७ लाख ५ हजार ५०० कित्ता शेयर सर्वसाधारणका लागि बिक्री खुला गरिएको हो।

लगानीकर्ताले न्यूनतम १० कित्ता र अधिकतम ५ हजार कित्तासम्मका लागि आवेदन दिन सक्ने व्यवस्था रहेको छ।

आईपीओको बिक्री प्रबन्धक ग्लोबल आइएमई क्यापिटल लिमिटेड रहेको छ। इच्छुक आवेदकहरूले सम्पूर्ण आस्बा सदस्य बैंक तथा वित्तीय संस्था, तिनका तोकिएका शाखा कार्यालयहरू तथा Mero Share मार्फत आवेदन दिन सक्नेछन्।

कम्पनीको वित्तीय अवस्था मूल्याङ्कन गर्दै CARE Ratings Nepal ले ‘केयरएनपी डबल बी माइनस’ (CARE-NP BB-) इस्यूअर रेटिङ प्रदान गरेको छ, जसले वित्तीय दायित्व बहन गर्ने क्षमतामा मध्यम जोखिम रहेको संकेत गर्दछ।

कैलालीमा उद्योग सञ्चालन गर्दै आएको सर्वोत्तम पेन्ट्सले भित्री तथा बाहिरी भित्ताका इमल्सन र इनामेल पेन्ट उत्पादन तथा बिक्री गर्दै आएको छ। कम्पनीको दैनिक उत्पादन क्षमता १४.३ मेट्रिक टन रहेको छ।

गत आर्थिक वर्ष २०८१/८२ को वित्तीय विवरणअनुसार कम्पनी २ करोड ५९ लाख रुपैयाँभन्दा बढी सञ्चित नाफामा रहेको छ। सो अवधिमा कम्पनीको प्रतिशेयर आम्दानी (EPS) ७ रुपैयाँ ५८ पैसा तथा प्रतिशेयर नेटवर्थ ११० रुपैयाँ १७ पैसा रहेको छ।