युक्रेनमाथि रुसी हमलापछि यसकारण बढ्न थाल्यो तेलको मूल्य

रुसले युक्रेनमाथि हमला गरेपछि विश्व अर्थतन्त्रमा कम्पन आएको छ । विश्वभर महङ्गी बढ्न थालेको छ ।

पेट्रोलियम पद्धार्थको मूल्य निरन्तर उकालो लागिरहेको छ । रुस र युक्रेन दुवै पेट्रोलियम पद्धार्थको उत्पादक राष्ट्र हुन् ।

विश्वको सबैभन्दा ठूलो देश रुस र यूरोपको दोस्रो ठूलो देश युक्रेन गहुँ, सूर्यमुखी फूल, मकैं बढी निर्यात गर्ने देश पनि हुन् । आपूर्तिमा अवरोधले यी खाद्य सामाग्रीको मूल्य बढ्न थालेको छ ।

रुस र युक्रेनले विश्वको २५ प्रतिशत गहुँ, २० प्रतिशत मकैं र ८० प्रतिशत सूर्यमुखीफूलको तेल उत्पादन गरी निर्यात गर्दछन् । आपूर्तिको अवरोधले अमेरिका, यूरोपलगायतका देशहरुमा यी सामाग्रीको मूल्य बढेको हो । दुवै देशले यूरोप र मध्यपूर्वमा बढी निर्यात गर्दछन् ।

पेट्रोलियम पद्धार्थको मूल्यवृद्धिले ढुवानी लागत बढ्नु र खाद्य सामाग्रीको आपूर्तिमा पनि अवरोध हुनुले विश्वका कतिपय देशमा अभावहरु देखिनथालेको छ । युक्रेनसँग रुसको युद्ध चाँडै नरोकिए गहुँ, सूर्यमुखीको तेल र मकैंको मूल्य दोब्बर हुनसक्ने औल्याइएको छ ।

युक्रेनको संकट चाँडै समाधानका लागि जर्मनी, फ्रान्सलगायतका देश लागिरहेका छन् । भारत पनि यसमा लागिपरेको छ । यूरोप ठूलो संकटमा जानसक्ने खतरा बढेको छ । भारत, नेपाल जस्ता देशहरुमा पेट्रोलियम पद्धार्थ र खाने तेलको मूल्य बढ्दा अर्थतन्त्रमा ठूलो असर पर्न थालेको छ ।